Скопје, 4 април 2024 (МИА) - Не купувај - вдоми, не одминувај - нахрани, не врти глава - помогни, порачува Јавното претпријатие „Лајка“ на Светскиот ден на бездомните животни.

- Денеска, 4 април, е Светски ден на бездомните животни и служи како потресен потсетник за 600 милиони бездомни животни ширум светот, кои се соочуваат со секојдневна борба за опстанок. Од раздвижените градски улици, до оддалечените рурални области, овие животни на улица често се соочуваат со глад, разболување, изложени се на екстремни горештини, студови и жега. Уште почесто, тие се бркани од непријателски расположени и насилни луѓе. Сепак, среде нивните предизвици, тие покажуваат издржливост и непоколеблива надеж за подобра иднина, пишува во соопштението од ЈП „Лајка“.

Овој ден, се додава во соопштението, нѐ поттикнува да размислиме за нашите одговорности кон овие ранливи суштества.

- Тоа нѐ поттикнува да го признаеме огромното страдање што го трпат и да преземеме значајни акции да нема бездомни животни. Ширењето на свеста е само почеток. Од клучно значење е активно да се вклучиме во напорите за ублажување на нивната мака. Изборот нека биде вдомување наместо купување, стерилизација наместо размножување, одговорно сопствеништво наместо напуштање, се истакнува во соопштението на „Лајка“.

Оттаму повикаат сите да се обединат во солидарност со овие безгласни суштества.

- Да ги засилиме нивните приказни, да ја подигнеме свеста за нивните борби и да работиме неуморно за да создадеме иднина, каде ниедно животно не е оставено да се грижи за себе. Заедно, можеме да направиме длабоко и трајно влијание во животот на бездомните животни насекаде, се додава во соопштението на „Лајка“. бд/дма/

Фото: „Лајка“