Кичево, 30 јануари 2022 (МИА) - Долгоочекуваната уникатна изложба на единствениот кичевски казанџија Коста Галиманоски ќе се одржи на почетокот на април, кога целата колекција планирана за оваа изложба ќе биде подготвена, а ќе бидат поканети и претставници од странски амбасади од чии земји примероци од штитови ќе бидат претставени на изложбата. -Сите предуслови се обезбедени и можам да најавам дека на почетокот на април ќе се одржи уникатната изложба на рачни изработки од бакар од штитови, мечеви, амблеми, стари монети, грбови, знамиња и минијатурни казанчиња. Сите изработки ќе бидат моја инвенција и добиени од бакар. Изложбата ќе ја сочинуваат пет мечеви, 15 штитови, 70 слики од бакар од антички монети, педесетина амблеми и грбови и веќе добро познатите малолитарски казанчиња за добивање на коњак. Во овие изработки ќе имам  уникатни штитови користени за време на антиката, потоа во средниот век, како и  монети од времето на Александар, изјави авторот на изложбата Галиманоски. Тој го најави присуството на изложбата на претставници на амбасадите на Франција и Британија. -Покрај комплетирањето на целокупната колекција, во претстојниот период ќе ги посетам амбасадите од земјите чии изработки ќе бидат претставени на изложбата  да бидат мои гости, рече Галиманоски и потсети дека покрај во родното Кичево оваа изложба ќе биде претставена и во главниот град, Охрид, Битола, а не е исклучена можноста да гостува и во српската метропола Белград, каде во неколку наврати на саеми ги претстави своите производи.за/вј/