Промоција на проект за бесплатна правна помош имплементиран од Советот на Европа
- Во Тетово денеска ќе биде промовиран проект за бесплатна правна помош, со цел граѓаните да се информираат за бесплатната правна помош, како и да се осигури подобра искористеност и пристап до овие услуги.
![Промоција на проект за бесплатна правна помош имплементиран од Советот на Европа](https://new.mia.mk/index.php/images/20231017181915_big_730x400_34.webp )
Тетово, 18 октомври 2023 (МИА) - Во Тетово денеска ќе биде промовиран проект за бесплатна правна помош, со цел граѓаните да се информираат за бесплатната правна помош, како и да се осигури подобра искористеност и пристап до овие услуги.
Оваа промоција е дел од серијата активности за подигање на свеста, поддржани од Европската Унија и Советот на Европа во соработка со Министерството за правда, што ќе се одржат во различни региони во државата со цел е да се промовира користењето на бесплатната правна помош, со посебен осврт на ранливите категории.
- Јавните промоции ќе допрат до разни локални заедници за да им дадат детални информации на граѓаните за тоа каде и како можат да најдат бесплатна правна помош и кои институции/организации ја даваат. За време на настанот, учесниците ќе имаат можност да им постават прашања на експерти од областа и да добијат одговори, како и да добијат лесно разбирливи информативни материјали за конкретните теми за коишто може да се побара и добие бесплатна правна помош, вклучувајќи семејно насилство, имотни прашања, дискриминација и социјална заштита, итн, соопштија од Министерството за правда.
Оваа иницијатива е организирана во рамките на проектот „За консолидиран и поефикасен систем за бесплатна правна помош (БПП) во Северна Македонија“, дел од заедничката програма на Европска Унија и Совет на Европа „Хоризонтален инструмент III за Западен Балкан и Турција“. цр/хс/
Фото: Министерство за правда