Скопје, 10 март 2023 (МИА) - Канаѓаните НАДЈА и Уочи Токи од Италија вечерва, со почеток во 21 часот, ќе одржат концерт во  Младинскиот културен центар во Скопје.

- НАДЈА е дуо на мултиинструменталистот Ајдан Бејкер и басистката Леа Бакареф – активни од 2005 година, кои создаваат музика опишана како експериментален нојз/дум/дримслаџ/металгејз, препознатлив по тоа што ги комбинира атмосферските текстури на шугејзот со амбиентална заднина која има тежина и густина на индустриска бучава. Чувството на концертите на Надја се како да делите попладневна дремка покрај силно мамурниот Иги Поп додека сабвуферот експлодира кај соседите од вашиот кат. Сурово, но и чудно како сон. Бејкер и Бакареф работат со оваа контрадикторност, произведувајќи звук што бара брутални, тешки монорифови и ги претвора во спектрални апстракции. Алхемискиот процес на Надја беспрекорно го трансформира тежок метал во апстрактна величественост и конечно во еден вид блажено распаѓање, велат од МКЦ.

Во својата богата кариера, вклучуваат настапи на фестивали како „SXSW“, „FIMAV“, „Roadburn“, „Donaufest“, „Le Guess Who“, „Incubate“ и „Unsound“ и заеднички настапи со музички артисти како „Earth“, „OM“, „Khanate“, „Neurosis“, „Godflesh“.

Ајдан Бејкер и Леа Бакареф се по потекло од Торонто, Канада, а сега живеат во Берлин, Германија.

Ова е нивен втор настап во Скопје, откако во 2012 година настапија во рамки на ’Cinemusic‘ програмата на филмскиот фестивал Синедејс.

- Како предгрупа на канадското дуо, ќе имаме можност да проследиме „VR“-сет на Италијанците Уочи Токи, кој е магматичен ансамбл од искривени електронски ритми, мрачни амбиентални дронови и течни гличови поддржани од пирокластичен цртеж во живо во виртуелна реалност проектирана на екран. Паѓајќи во сржта на импровизацијата, овој настап станува театарска 3Д-анимација од обоени знаци, подземен проток на звуци и слики. Рико и Напо, двајцата Уочи Токи, ќе го донесат низ Европа сетот VR што го развија минативе години во Италија, соопштуваат од МКЦ.

Концертот започнува во 21 часот, билетите се во продажба на билетарницата на МКЦ или онлајн на линкот bileti.mkc.mk. ир/сп/