Софија, 11 август 2022 (МИА) - Началникот на одбраната на Бугарија, адмирал Емил Ефтимов, оствари работна средба со началникот на Генералштабот на копнената армија на Обединетото Кралство, генерал-мајор Колин Веир, соопшти прес-центарот на Министерството за одбрана. Како што јави дописникот на МИА од Софија, адмирал Ефтимов изрази благодарност за континуираната поддршка и посветеност на Обединетото Кралство за зајакнување на источното крило на НАТО, како и за распоредувањето на воени формации на територијата на Република Бугарија и можноста за спроведување на заедничка обука. Високиот британски воен Веир од своја страна му се заблагодари на военото раководство на бугарското Министерство за одбрана за поддршката дадена на британската воена формација која спроведува заедничка обука со делови од копнените сили на бугарската армија. Тој го изрази своето задоволство од нивото на обука и сподели дека е многу корисно за британската војска да ја зголеми својата интероперабилност. Адмиралот Ефтимов го информираше генерал-мајор Вир за процесот на формирање борбена група на НАТО во Бугарија и нагласи дека форматот останува флексибилен со можност за заедничка обука, што сојузниците секогаш можат да ги искористат.  нк/