НАТО го осуди рускиот план за одржување избори во окупираните делови на Украина
Брисел, 8 септември 2023 (МИА) - НАТО изрази осуда за Русија поради најавата за одржување избори во окупираните региони на Украина.
„Овие избори се фарса, нелегитимни и уште едно кршење на меѓународното право“, изјави портпаролот на НАТО Дилан Вајт на социјалната мрежа Х, порано позната како Твитер.
Тој повтори дека НАТО ја поддржува Украина и ќе продолжи да го прави тоа.
Претходно, САД и Германија, исто така, ги осудија планираните локални избори во источна Украина во региони под контрола на руските сили.
Руските власти најавија одржување на локални избори следниот викенд во регионите Доњецк, Луганск, Крим и делови од Херсон и Запорожје.
Западните земји ја обвинуваат Русија дека се обидува да ја легитимизира анексијата на украинската територија со одржување избори на окупираните територии. ссм/
