Неапол, 23 февруари 2025 (МИА) - Наполи го загуби водечкото место во италијанскиот фудбалски шампионат, откако попладнево загуби на гостувањето кај Комо со 2:1.

Така, избраниците на Антонио Конте со 56 бода, по 26. коло паднаа на втората позиција во поредокот во Серија А.

Интер, кој на вчерашниот натпревар ја победи Џенова со 1:0, освои 57 бода и се искачи на првото место во Серија А.

Наполи нема победа на последните 4 натпревари во низа. Тимот претходно ремизираше со Рома (1:1), Удинезе (1:1) и Лацио (2:2).

Во следниот натпревар Наполи ќе игра токму со Интер на свој терен. Натпреварот од 27. коло во Серија А ќе се одигра на 1 март. зс/

Фото: ЕПА