Москва, 6 јуни 2023 (МИА) - Рускиот противник на Кремљ, Алексеј Навални ќе се соочи со ново судење за обвиненијата за екстремизам, почнувајќи од денеска. Правниот случај се очекува да се занимава со наводите за екстремизам.

Според адвокатот на Навални, градскиот суд во Москва ќе заседава во казнениот камп на 260 километри североисточно од главниот град, во судење затворено за јавноста.

Доколку биде прогласен за виновен, на 47-годишниот Навални, најистакнатиот противник на рускиот претседател Владимир Путин, му се заканува уште 30 години затвор. Тој веќе отслужува деветгодишна затворска казна, од која досега одлежа повеќе од две години.

Судството формулираше седум нови обвиненија, вклучително и основање и финансирање  екстремистичка организација и минимизирање на нацизмот. Навални ги негира обвинувањата.

Навални, кој е меѓународно најпознатиот руски дисидент, беше отруен со нервен агенс новичок за време на патувањето во Сибир летото 2020 година. Тој ја обвинува руската домашна тајна служба ФСБ дека стои зад труењето. По лекувањето во Германија, тој се врати во Русија и покрај тоа што му се заканувала затворска казна.

Во меѓувреме, за жалбата на Навални денеска треба да одлучува и Европскиот суд за човекови права (ЕСЧП) во Стразбур. Навални се пожали на судот дека руските власти не покренале истрага за труењето. Тој тврди дека со тоа е повредено неговото право на живот и ефективен правен лек.

Русија повеќе не ги признава пресудите на Европскиот суд за човекови права. Земјата беше исфрлена од Советот на Европа поради војната против Украина. Поради тоа, таа повеќе не е членка на Европската конвенција за човекови права, за чие почитување е надлежен судот. Во Стразбур се водат неколку илјади постапки против Русија. Советот на Европа, Конвенцијата за човекови права и Судот се независни од Европската унија. паг/

Фото: МИА архива