Муцунски: ВМРО-ДПМНЕ треба да учествува во техничката влада
- Крајната одлука за тоа дали ВМРО-ДПМНЕ ќе учествува или нема да учествува во техничката влада е одлука која што треба да се донесе од страна на органите на нашата партија. Тука мислам на Извршниот комитет на партијата и на Централниот комитет и очекувам дека во следните неколку недели, таква одлука ќе се донесе, односно ќе го види јавноста нашиот конечен став
![Муцунски: ВМРО-ДПМНЕ треба да учествува во техничката влада](https://new.mia.mk/index.php/images/20231212202044_big_730x400_11.webp )
Скопје, 12 декември 2023
Крајната одлука за тоа дали ВМРО-ДПМНЕ ќе учествува или нема да учествува во техничката влада е одлука која што треба да се донесе од страна на органите на нашата партија. Тука мислам на Извршниот комитет на партијата и на Централниот комитет и очекувам дека во следните неколку недели, таква одлука ќе се донесе, односно ќе го види јавноста нашиот конечен став, вели потпретседателот на ВМРО-ДПМНЕ, Тимчо Муцунски во неговото гостување на телевизија Алсат.
Муцунски посочи дека негово лично мислење дали ВМРО-ДПМНЕ треба да учествува во техничка влада е афирмативно, односно смета дека тоа е потребно од повеќе гледни точки.
„Прво анкетите на јавното мислење, но и секојдневната комуникација статистички ни покажува дека осум од 10 граѓани се незадоволни од правецот во кој што се движи Република Македонија, што значи дека тие граѓани очекуваат промени. За да им обезбедиме ние на граѓаните промени, да им обезбедиме демократски и фер изборен процес , сметам дека е потребно да влезе ВМРО-ДПМНЕ во институциите. Примарно, петте институции во кои што ќе добие раководни позиции, за да можеме да гарантираме колку што има капацитети од гледна точка на надлежностите на тие органи на управата, дека изборниот процес ќе биде фер, кредибилен и граѓаните да може низ демократска призма да го изразат своето право на гласање“, рече Муцунски.
Тој посочи дека здраво е секоја партија да дискутира и да донесе одлука, по било кое прашање, во органите на партијата, додека пак ДУИ во недостаток на концепт заради преобемната корупција која што ја гледаме на секое поле, секој ден слушаме како шират демагогија, посебно од претставниците на ДУИ, посебно министерот за надворешни работи и потпретседател на партијата, Бујар Османи, кој што постојано зборува за албонофобија.
Муцунски додаде дека не станува збор за албанофобија, туку за фобија и тоа кон одредени поединци во ДУИ, а не кон целата ДУИ, затоа што и таму има луѓе кои ја сакаат и сакаат да придонесат за развој на државата.
„Факт е дека има сериозна колизија во вредносниот систем кој што ние го имаме како луѓе, со вредносниот систем кој што го имаат поединци на во раководството на ДУИ за кои што гледаме сериозни сомнежи за корупција од кои што ние не можеме да видиме ниту еден конкретен проект важен за граѓаните во државата, независно дали името на граѓанинот е Висар или Виктор, дали е Јеона или Јована, не гледаме напредок“, рече Муцунски.
--------------------
Доколку разговарате со претставници на голем број членки на ЕУ тие во неформални разговори ќе ви кажат дека најголемата блокада која што Македонија си ја поставува на самата себеси е недостатокот од реформи, распространетата корупција на секое поле која што евидентно беше нотирана во најнегативниот извештај кој што Европската комисија го има дадено за Македонија, вели потпретседателот на ВМРО-ДПМНЕ во интервју на Алсат телевизија запрашан за тоа дали партијата се гледа како блокатор на европската иднина на Македонија.
Додаде дека секојдневно гледаме неиспорачување на клучните реформи насочени кон владеење на правото, борба против корупцијата, реформа во правосудството.
„Македонија да беше успешна земја, да чекореше напред, позитивно кон патот на реформите, верувам дека немаше да дојдеме ни до ваква ситуација . Ние велиме дека треба на достоинствен начин, македонските национални интереси да бидат заштитени, да Македонија да чекори напред кон евроинтегративниот процес, но притоа, на никој начин да не биде оштетен националниот идентитет на Македонците кои што живеат во државава“, рече Муцунски.
Посочи дека ВМРО-ДПМНЕ има план и концепт како да го реализира членството во Европската унија, а истовремено да го заштити националното достоинство на Македонците.
„Имаме план, имаме концепт како тоа да го реализираме и верувам дека со дипломатија која што е насочена помалку кон самопромоција на личноста и градењето на култ на министерот за надворешни работи, туку дипломатија која што ќе биде насочена кон постигнување на политички резултати, посебно во комуникацијата со земјите членки, може да се постигне некое такво решение кое што ќе значи и заштита на националното достоинство на Македонците и успех во евроинтеграцискиот пат“, истакна Муцунски.
Во однос на евентуално коалицирање после победата на изборите следната година, за што се поизвесно е дека ВМРО-ДПМНЕ ќе извојува убедлива победа, Муцунски рече дека посакувана опција е ВМРО-ДПМНЕ да формира реформска влада, влада која што ќе биде базирана на политики, влада која што ќе биде базирана на привлекување на странски директни инвестиции, на отворање на нови работни места.
„Време е идна коалиција со било кој субјект да се базира на политики и на тоа што можеме ние за да имаме успешно образование, да имаме јавно здравство кое што не ги тера нашите граѓани да трошат стотици и илјадници евра на месечна основа да се лекуваат во приватни клиники и надвор од нашата држава. Тоа е тоа, тоа е тој фундамент врз основа на кој треба да ја градиме идната влада“, посочи потпретседателот Муцунски.
Центар за комуникации на ВМРО-ДПМНЕ
_______________________________________________________________________________________
МИА овие текстови ги објавува во интегрална и оригинална форма и не е одговорна за нивната содржина, ниту за евентуалните правописни недоследности или печатни грешки.