Скопје, 10 април 2025 (МИА) - Македонскиот народен театар со претставата „Народен пратеник“ од Бранислав Нушиќ, во адаптација и режија на Егон Савин, на 4 јуни ќе гостува во Народно позориште во Белград.

МНТ информира дека со „особена радост и официјално“ ја примиле веста од Народно позориште во Белград за терминот за гостување со претставата „Народен пратеник“ која, како што наведува, „е од најсвежата продукција на МНТ, и го доживува својот успех и надвор од границите“.

-Директорот Никола Кимовски со особена чест го прифати ова гостување да се случи на 4 јуни 2025. Претставата со фантастичната актерска екипа ќе се одигра на сцената „Раша Плаовиќ“.
Ова е едно позитивно надополнување во патувачката агенда и организираната турнеја на Македонскиот народен театар, кое дава посебна динамика, ги обединува уметничките изрази, културните разлики и емоционалните искуства на различните сцени. За актерите, продукцискиот тим, пред сѐ за публиката, тоа е исполнување на инспиративни, креативни предизвици. Секој нов град и секоја нова публика носи нови искуства и возбуда кои го трансформираат и го  осветлуваат доживувањето на уметноста. Таа е мост меѓу различни култури и традиции, овозможувајќи размена на идеи, наведува МНТ во соопштението.

„Народен пратеник“  завчера, 8 април, беше изведена на сцената на Црногорско народно позориште, каде што МНТ гостува и со претствата „12“ во режија на Синиша Евтимов, која беше вчера одиграна во ЦНП. хс/са/

Фото: МНТ