МНД-Битола го промовира новото издание на списанието „Современи дијалози“
- Излезе од печат списанието за култура – литература, драмска уметност, филм и издаваштво „Современи дијалози“ бр. 13 за 2023 година, издание на Македонско научно друштво-Битола.
![МНД-Битола го промовира новото издание на списанието „Современи дијалози“](https://new.mia.mk/index.php/images/20231129102629_big_730x400_95.webp )
Битола, 29 ноември 2023 (МИА) - Излезе од печат списанието за култура – литература, драмска уметност, филм и издаваштво „Современи дијалози“ бр. 13 за 2023 година, издание на Македонско научно друштво-Битола.
Новиот број на „Современи дијалози“ содржи прилози од вкупно 75 автори и осум ликовни уметници од земјата и од странство, а читателите можат да прочитаат поезија, проза, книжевна и театарска критика.
-Во рубриката „Акценти“ застапени се прилози од трибината за писателот Владимир Костов, за одбележувањето на 63-годишното постоење на Македонското научно друштво-Битола кое го раководи проф. д-р Невена Груевска, и за тематската вечер „Интерфест, тридецениски културен белег на Битола“ во организација на МНД-Битола. Во рубриката „Паралели“ посветена на меѓународната соработка, застапени се 46 автори од 33 држави во светот, меѓу кои Саудиска Арабија, САД, Германија, Обединети Арапски Емирати, Белгија, Романија, Кореја, Шпанија....Корицата ја дизајнираше Весна Мундишевска-Велјановска со скулптура од Витолд Закржевски, фотографија од Томас Вендланд од Полска, соопштија од МНД-Битола.
Списанието е финансирано од Министерството за култура, а го уредува редакција составена од професор д-р Даниела Андоновска-Трајковска, главен уредник, Весна Мундишевска-Велјановска, професор д-р Силвана Нешковска и доцент д-р Анита Ангелевска со помош на меѓународен уредувачки одбор. мт/
Фото: МНД-Битола