Атина, 9 април 2026 (МИА) - Грчкиот премиер Киријакос Мицотакис денеска рече дека е неприфатливо бродовите да плаќаат надомест за премин низ Ормуската Теснина, како што тоа го предложил Иран, оценувајќи дека таквиот потег би претставувал опасен преседан за слободата на пловидбата.

Мицотакис потсети дека пловидбата низ Ормуската Теснина секогаш била слободна порачувајќи дека таквата пракса мора да продолжи.

Белата куќа денеска соопшти дека американскиот претседател Доналд Трамп изнел идеја САД да остваруваат приходи од бродовите што минуваат низ Ормуската Теснина преку наплата на дозволи за премин.

Претходно, официјален Техеран предложи да се плаќа надомест за безбедно преминување на трговските бродови низ Теснината.

Војната против Иран го загрози работењето на пристаништата во Персискиот Залив и го наруши глобалниот трговски сообраќај што се одвива низ Ормуската Теснина, низ кој се транспортира петтина од светската нафта и течниот природен гас.

Грчката трговска флота е една од најголемите во светот според капацитетот за превоз на товар. аб/сд

фото/МИА архива