Мицкоски: Под овие услови нема да се согласиме Бугарите да влезат во Уставот
- Под овие услови ниту сега, ниту во иднина нема да се согласиме Бугарите да влезат во Уставот, изјави утрово претседателот на ВМРО-ДПМНЕ, Христијан Мицкоски.
![Мицкоски: Под овие услови нема да се согласиме Бугарите да влезат во Уставот](https://new.mia.mk/index.php/images/20240826160144_big_730x400_97.webp )
Скопје, 13 октомври 2023 (МИА) - Под овие услови ниту сега, ниту во иднина нема да се согласиме Бугарите да влезат во Уставот, изјави претседателот на ВМРО-ДПМНЕ, Христијан Мицкоски.
Во утринската емисија на радио „Лидер“, Мицкоски посочи дека додека е претседател на ВМРО-ДПМНЕ и доколку не дојде до промена на условите, без разлика дали ВМРО-ДПМНЕ ја води Владата или не ја води Владата нема да се случат промени, како што вели, од принципиелни причини.
Според Мицкоски, досега Бугарија нема покажано добра волја кон нашата држава.
-Што е тоа што ќе покаже Бугарија како знак на добра волја дека навистина во иднина нема да има било каква било каква опструкција кон Македонија. Што е тоа што Бугарија го покажа и го манифестираше? Јас од таму не гледам сигнали освен тоа што молчат, рече Мицкоски.
Тој посочи дека не знае друга држава која имала билатерален спор во Преговарачка рамка.
На прашањето во врска со претстојните претседателски избори, Мицкоски одговори дека ВМРО-ДПМНЕ нема да ги бојкотира изборите.
-ВМРО-ДПМНЕ влегува во овие избори како фаворит и јас кажав во неколку наврати дека кандидатот на ВМРО-ДПМНЕ во првиот круг ќе води пред кандидатот на ДУИ и СДС отприлика околу 100.000 гласови. Нема потреба зошто да ги бојкотираме, друго е прашањето кои се предизвиците со коишто ќе се соочи Македонија во периодот кој следи, а кои е поврзани со тој изборен процес и парламентарните избори, изјави Мицкоски.
Тој нагласи дека ако изборите не бидат успешни, бидејќи има фингерпринт терминали нема полнење кутии како во минатото, и нема како порано од присутни 25-30 отсто од избирачите, а излезноста 90 проценти или 97 отсто како што беше на некои места на референдумот, тогаш може да влеземе во континуиран процес на избори и државата тоа нема да го издржи.
- Многу е важно како ќе се организираме и како ќе ја организираме државата бидејќи сме на 4 месеци од изборна кампања, мора да завршиме претседателски избори во април. Ако тој процес е успешен претседател треба да има на 12 мај. По принцип две недели порано треба да заврши вториот круг, а тоа значи дека најдоцна треба да заврши вториот круг на 28 април, тогаш првиот круг е 14 април, рече Мицкоски.
Лидерот на ВМРО-ДПМНЕ посочи дека актуелната власт се однесува неодговорно кон државата и ресурсите.
- Ако се грижиш за државата, треба да се грижиш и за ресурсите на државата, а прашањето е дали Македонија има доволно ресурси за таков краток период да изработи три изборни циклуси имајќи предвид дека требаат два круга за претседателските избори. Логичната анализа вели дека со вториот круг на претседателските треба да се организираат и парламентарните. Дајте на лидерска средба да ги договориме датумите, на неколку месеци сме пред кампања, секогаш имало дијалог, никогаш не се случувало ова, вели Мицкоски.
Според Мицкоски власта бега од дијалог и од лидерска и од дијалог во Собрание, а, како што вели, ни следат важни процеси.
- Ако се случи да има неуспешни претседателски избори, условно кажано, тогаш рокот е за 40 дена треба да се повтори процесот. Можеме да влеземе во континуиран процес на избори и да се измори државата. Друго прашање е дали ние како општество можеме ова да го издигестираме или дали економијата може. Стопанството е загрижено и вели ако влеземе во таков процес бидејќи и 2025 има други, нема да може да се издржи во државата. Имаме сега ситуација кога опозицијата се однесува одговорно, а власта неодговорно, нагласи тој.
Мицкоски потенцира дека ако немој мисли дека ќе си играат и ќе има услови, или техничка влада како таа на Спасовски и ќе се носат уредби, ќе биде суспендиран Парламентот, тоа нема да се случи.
- Ограничени им се маневарските способности. Тоа така нема да оди. Подготвени сме за сите сценарија, ВМРО-ДПМНЕ и народот нема да биде нем набљудувач, изјави Мицкоски. дма/са/
Фото:МИА архива