• петок, 26 јули 2024

Мицкоски од универзитетот Џон Хопкинс: Најголемиот приоритет мора да е економијата, времето на политичари заштитници на криминалот завршува

Мицкоски од универзитетот Џон Хопкинс: Најголемиот приоритет мора да е економијата, времето на политичари заштитници на криминалот завршува

Скопје, 8 јули 2024 (МИА) -  Претседателот на Владата, Христијан Мицкоски во рамки на неколкудневната посета на САД, денеска одржал предавање на престижниот Универзитет Џон Хопкинс во Балтимор, каде покрај на темите важни за Македонија, се осврнал на повеќе теми од интерес на регионот и пошироко, соопшти владината прес-служба.

-Најголем приоритет на Владата пред се ќе биде зајакнување на економијата. А таа не може да расте, ако нема одлучна борба против криминалот и корупцијата. Мораме да се соочиме со криминалот и корупцијата ако сакаме да ја развиеме нашата држава за следната генерација. Има голема коалиција помеѓу одредени политичари, судии, обвинители и бизнис елита, и ние мора да ја разбиеме таа коалиција, во спротива ќе потфрлиме исто како сите наши претходници и би биле поразени, потенцирал Мицкоски.

Претседателот на Владата истакнал дека трите најважни паларии ќе бидат инвестициите во енергетиката, Интер конекторот на гас како и вложувањата во инфраструктурата.

Премиерот соопштил дека од самиот почеток тргнал со идејата за распуштање на Судскиот совет и Советот на јавни обвинители, затоа што тие две институции имаат само 2% доверба меѓу граѓаните.

-Кога има проблем треба да се соочиме со него и да се даде решение. Има експерти кои се против, но никој не дава решение како да се реши истиот. Ние сега имаме статус кво, но ќе ја продолжиме нашата борба, во насока да донесеме правда и надеж, тие два столба одат заедно, во спротива би потфрлиле, кажал Мицкоски.

Тој потенцирал дека ќе се бори за своите ставови, ќе се соочи со аргументи со сите експерти, затоа што народот е гладен за правда.

Премиерот Мицкоски се осврнал и на ветото на Бугарија. Тој истакнал дека треба да се разговара за вистински добрососедски односи, но тие да бидат двонасочни, македонските граѓани премногу жртвуваа за европската перспектива и доста е со понижувања.

-Ние не сме политичари полни со наводи за криминал и корупција какви има во регионот. Ќе ги штитиме нашите интереси, подготвени сме да разговараме со аргументи, да ги презентираме истите, да видиме чии аргументи ќе преовладеат. македонските граѓани за европската перспектива дадоа како никој досега, изјавил Мицкоски.

Од друга страна Мицкоски се задржал и на актуелното прашања со Украина.

-Мојата држава е огромен донатор за Украина. Собранието гласаше за огромна поддршка за Украина. Ние сме меѓу топ 5 доставувачи на помош по глава на жител во светот, истакнал премиерот Мицкоски, посочувајќи дека ние не сме толку голема и богата држава, но сме направиле максимални напори во насока да ја поддржиме Украина и украинскиот народ. дма/бак/

Фото:Влада

Остани поврзан