Скопје, 11 јануари 2024 (МИА) - Министерот за здравство Фатмир Меџити и главниот државен ревизор од Државниот завод за ревизија Максим Ацевски, денеска потпишаа Меморандум за соработка, со цел унапредување на меѓусебните односи во областите од заеднички интерес за двете институции, информираат попладнево од Министерството.

Според министерот за здравство, потпишаниот Меморандум за соработка предвидува редовна комуникација, соработка и размена на податоци од областа на здравството.

- Со главниот државен ревизор Ацевски планираме да реализираме значајни активности, како изработка на модул за извештаи од работата на здравствените установи, во рамките на Националниот систем за електронска евиденција во здравството, за потребите на Државниот завод за ревизија. Извештаите треба да содржат податоци од регистрите што се водат во Националниот систем и да понудат прегледи по различни критериуми - преглед на медицинска опрема кај здравствените установи, тековна состојба со податок за датум за ставање во употреба, понатаму преглед на објавени слободни термини, зафатени и не зафатени термини на дневно, месечно, годишно ниво или за определен период, по установа и специјалност, се наведува во писмената изјава на Меџити.

Тој појаснува дека извештаите треба да содржат и преглед на издадени регуларни, приоритетни и итни упати по установа и специјалност на месечно ниво, или за определен период, како и преглед на реализирани упати - регуларни, приоритетни, итни, сервисни, на месечно ниво по установа и специјалност, или за определен период.

- Со потпишаниот Меморандум, Министерството за здравство и Државниот завод за ревизија се обврзуваат да обезбедат систем за заштита на податоците од неовластено користење и злоупотреба, но и сите добиени податоци и информации, согласно овој договор, да ги користат исклучиво за потребите на спроведување на постапки за ревизија, нагласуваат од Министерството за здравство. бд/ев/

Фото: Министерство за здравство