Белград,  22 ноември 2024 (МИА) - Министерот за јавна администрација, Горан Минчев, присуствува на Третиот меѓународен саем за вино, храна, ракија и туризам „Винска визија на Отворен Балкан“, кој ќе се одржува од 22 до 24 ноември 2024 година на Белградскиот саем.

- Министерот Минчев изрази задоволство што Република Македонија, преку вакви значајни регионални иницијативи, ја зајакнува својата улога во промоцијата на културниот и економскиот потенцијал на земјата, особено во областа на винската и гастрономската индустрија, наведуваат во соопштение од Кабинетот на министерот за јавна администрација. 

Како што потенцираат, овој значаен настан, кој е дел од иницијативата Отворен Балкан, претставува најголема платформа за промоција на регионалните кулинарски и вински богатства, каде што своето место ќе го заземе и Македонија со својот автентичен гастрономски идентитет.

Во рамки на саемот, се одржува „Македонска вечер“, организирана под покровителство на Владата на Република Македонија и претседателот на Владата, Христијан Мицковски.

На оваа вечер присуствуваат високи делегати, владини претставници  и претставници од приватниот сектор, со што Македонија ќе има можност да ја презентира својата богата традиција во производството на вино и храна.

Оваа година, на саемот за вино, македонското учество на саемот ќе го опфатат голем број винарии и дестилерии, изложувачи на храна и ресторани со врвни македонски готвачи.

Преку нивната презентација, посетителите ќе имаат уникатна можност да ги вкусат врвните македонски вина, да уживаат во традиционалните вкусови и да се запознаат со гастрономските особености на нашата земја. ар/лв/

фото: МЈА