Загреб, 15 октомври 2024 (МИА) – Хравтскиот претседател Зоран Милановиќ денеска ги осуди нападите на израелските одбранбени сили (ИДФ) врз припадниците на мировните сили на Обединетите нации во Либан и рече дека нема оправдување за таквите напади.

Кабинетот на Милановиќ соопшти дека претседателот на Републиката ги осудува нападите кои го прекршуваат меѓународното право и ги загрозуваат животите на членовите на УНИФИЛ чија мисија е одржување на мирот и безбедноста во областа.

„Нема никакво оправдување за нападите врз членовите на УНИФИЛ, а единственото нешто што завојуваните страни, вклучително и израелските одбранбени сили, мора да го направат е веднаш да прекинат со каква било форма на напад и притисок врз мисијата на УНИФИЛ“, се наведува во соопштението од кабинетот на Милановиќ.

Оттаму посочуваат дека, како што предупреди Советот за безбедност на ОН, членовите и објектите на мировните сили на ОН никогаш не смеат да бидат цел на напади.

„Задачата на членките на УНИФИЛ е да го бранат меѓународниот мир и безбедност во оваа област, односно да обезбедат целосна имплементација на Резолуцијата 1701 на Советот за безбедност на ОН, усвоена во 2006 година со цел да се зачува мирот меѓу Либан и Израел. Членовите на УНИФИЛ се трудат да спречат ескалацијата на конфликтот, додека нападите на израелските одбранбени сили врз нив, за жал, ги попречуваат напорите на УНИФИЛ и директно придонесуваат за ширење на тој конфликт“, се додава во соопштението. сд/

фото:МИА архива