Скопје, 29 септември 2023 (МИА) - Медиумската информативна агенција (МИА) втора година по ред се приклучи на „Медиумскиот ден на средношколци“ што го организира Институтот за комуникациски студии.

Средношколци од четири училишта во државата ја посетија МИА и се запознаа со работата на Агенцијата, која дневно продуцира околу 400 вести и други медиумски продукти на македонски, англиски и на албански јазик.

Учениците се запознаа со начинот на продукција на вестите и другите медиумски продукти, а посебно внимание беше посветено на тоа како да се препознаат дезинформациите со кои е преплавен медиумскиот простор.

На учениците од „Раде Јовчевски-Корчагин“ и „Панче Арсовски“ од Скопје, како и од „Перо Наков“ од Куманово и „Гостивар“ од Гостивар им беше презентирано како новинарите од МИА ги препознаваат лажните вести и како самите да препознаат дали одредена информација што се пласира на социјалните медиуми е вистинита или лажна. 

Учениците имаа можност да видат и како работи делот за видео продукција, а дел од нив да се запознаат и со начинот на кој се пренесуваат во живо дневните настани. 

Медиумскиот ден за средношколци се организира седма година по ред. Во рамки на овој ден, денеска учениците посетија повеќе медиуми каде се информираа за начинот на работа на тие медиуми и за медиумската писменост, а попладнево ќе се одржи и панел дискусија за тоа дали дезинформациите се опасни или се само несолена шега. бак/ац/

Фото: МИА