Масовниот убиец Брејвик ја тужи Норвешка поради затворските услови
- Норвешкиот масовен убиец Андерс Беринг Брејвик се појави денеска на суд на првиот ден од новиот обид да ја тужи државата поради неговите услови во затворот.
![Масовниот убиец Брејвик ја тужи Норвешка поради затворските услови](https://new.mia.mk/index.php/images/20240108130247_big_730x400_56.webp )
Осло, 8 јануари 2024 (МИА) - Норвешкиот масовен убиец Андерс Беринг Брејвик се појави денеска на суд на првиот ден од новиот обид да ја тужи државата поради неговите услови во затворот.
Спортската сала на затворот Рингерике е претворена во привремена судница. Судијката Биргит Колруд ја прогласи постапката за отворена, според норвешките медиуми.
Привремената судница ќе се користи по втор пат од 2017 година за да се утврди дали Норвешка ги прекршила човековите права на 44-годишникот на начинот на кој тој е приведен.
Окружниот суд во Осло закажа петдневни сослушувања до и заклучно со петок.
Брејвик активираше автомобил-бомба во владиниот округ на Осло во јули 2011 година, а потоа изврши масакр во летен камп за младинската организација на Лабуристичката партија на островот Утоја. Терористичките напади, кои однесоа вкупно 77 животи, се сметаат за најлошите акти на насилство во повоена Норвешка.
Брејвик, кој долго време се нарекува Фјотолф Хансен, во 2012 година беше осуден на тогаш максимална казна од 21 година превентивен притвор со минимална казна од 10 години.
За разлика од нормалната затворска казна, превентивниот притвор значи дека казната може да се продолжува на секои пет години, што значи дека останува да се види дали Брејвик некогаш ќе излезе од затвор. мс/
фото: МИА архива