МАЕИ упати повик до Македонците: Слободно и гордо пријавете ја вашата македонска националност
- Пред утрешниот почеток на пописот на населението и домаќинствата во Албанија, единствената македонска партија во земјата, Македонска алијанса за ервропска интеграција, МАЕИ, ги повика Македонците да ја поддржат оваа значајна статистичка операција и слободно да се изјаснат за етничката и верска припадност и јазик.
![МАЕИ упати повик до Македонците: Слободно и гордо пријавете ја вашата македонска националност](https://new.mia.mk/index.php/images/20230917210208_big_730x400_34.webp )
Тирана, 17 септември 2023 (МИА) - Пред утрешниот почеток на пописот на населението и домаќинствата во Албанија, единствената македонска партија во земјата, Македонска алијанса за ервропска интеграција, МАЕИ, ги повика Македонците да ја поддржат оваа значајна статистичка операција и слободно да се изјаснат за етничката и верска припадност и јазик.
-Ова е многу важен процес за македонската заедница во Албанија, бидејќи во него ќе се декларира и етничката припадност на секој поединец. Иако ова прашање е оставено како „изјаснување по избор" МАЕИ љубезно ги повикува сите Македонци да се изјаснат за својата етничка припадност одговарајќи на прашањето „со каков етнички идентитет се идентификувате“, да напишат: „Македонец/Македонка“, стои во повикот.
Порачува „слободно и гордо пријавете ја вашата македонска националност и погрижете се попишувачот правилно да ја напиши на таблетот, како што вие ја изјавувате".
Проверете и уверете се дека одговорот на прашањето за етничка припадност, кој попишувачот го пополнува, е правилно внесен на таблетот (електронскиот уред) со кој попишува, според тоа што сте го пријавиле.
-Со декларирањето на пописот како Македонци придонесувате за видливост и препознатливост на нашата заедница во Албанија. Силата на нашиот идентитет лежи во нашето единство и нашата подготвеност да застанеме и да бидеме бројни. Ова е суштински чекор кон обезбедување на нашите права и зачувување на нашето културно наследство. Колку повеќе членови на нашата заедница гордо се идентификуваат како Македонци на пописот, толку повеќе права и заштита можеме да имаме според Законот за заштита на малцинствата во Република Албанија, стои во повикот.
Се наведува дека врз основа на Законот „За заштита на националните малцинства во Република Албанија“, од 2017 година, правата на малцинствата како што се правото на образование на мајчин јазик, употребата на мајчиниот јазик во локалните институции, употребата на мајчиниот јазик на патната сигнализација, застапеноста во јавните институции и слично се поврзани со нивниот број, затоа е "многу важно да се изјасните за вашата македонска припадност за да ги уживате правата што ви припаѓаат според Уставот на Република Албанија, Рамковната Конвенција на Совет на Европа за заштита на националните малцинства, ратификувана од Албанија и меѓународните договори од областа на човековите права во кои е членка Република Албанија".
-Сакаме да нагласиме дека изјаснувањето на вашиот македонски идентитет на пописот не е само законско право, туку моќен израз на вашето културно наследство. Испраќа јасна порака до општеството во целина дека македонската заедница во Албанија е енергична, горда и заслужува почит и признание што доаѓа со неа, се нагласува во повикот.
Разбираме, се посочува, дека некои сè уште имаат загриженост од различните притисоци што може да дојдат, но ве уверуваме дека вашето учество на пописот е доверливо и вашите податоци ќе бидат заштитени со закон. Информациите што ќе ги дадете ќе бидат доверливи и ќе се користат само за статистички цели и заштита на правата на македонската заедница.
- Го покануваме секој член на македонската заедница во Албанија да ја прифати оваа можност да се изјасни како Македонец на пописот. Вашиот мајчин јазик е македонскиот јазик, независно од Вашата вера православни, католици, муслимани или друго. Вашиот придонес не само што ќе ја зајакне нашата заедница, туку и ќе го подобри нашиот статус и влијание во албанското општество. Заедно, можеме да изградиме посветла и поинклузивна иднина за сите Македонци во Албанија, стои на крајот од повикот на МАЕИ до Македонците во Албанија пред почетокот на пописот. вт/лв/
фото: МАЕИ