Виена, 29 јули 2023 (МИА) – Експерти од Меѓународната агенција за атомска енергија (МААЕ) го посетија блокот пет на нуклеарната централа Запорожје (ЗНПП), ја прегледаа опремата и рекоа дека е во добра состојба и оти при проверката не се пронајдени мини или експлозив, соопшти МААЕ.

- Тимот на МААЕ вчера го прегледа блокот 5, каде што го прегледа јадрото на реакторот, базенот за потрошено гориво и генераторот на пареа. Тимот заклучи дека целата опрема се чини дека е во добра состојба, се вели во соопштението на МААЕ.

За време на посетата немаше ограничувања и тимот не забележа ниту мини или експлозиви, наведува Агенцијата.

„Сепак, за време на прошетката во периметарот на локацијата во четвртокот, тимот потврди дека мините што ги забележа на 23 јули сè уште се на место. МААЕ, исто така, продолжува да бара пристап до покривите на реакторите на ЗНПП и турбинските сали“ се додава во соопштението.

Експертите на МААЕ на 23 јули забележале насочени противпешадиски мини на периферијата на локацијата на украинската нуклеарна централа Запорожје. Тимот на МААЕ тогаш виде неколку мини лоцирани во тампон зона помеѓу внатрешните и надворешните периметарски бариери на локацијата. Експертите известија дека тие биле сместени во ограничена област до која персоналот на оперативната постројка не може да пристапи и дека биле настрана од локацијата. Тимот ни тогаш не забележа ништо во внатрешниот периметар на локацијата. јт/

Фото: МААЕ