Скопје, 4 јуни 2024 (МИА) – Министерот за правда Кренар Лога испратил писма до Делегацијата на ЕУ во Северна Македонија, до амбасадите на САД, Германија, Франција, Холандија и Белгија, до мисијата на ОБСЕ во Скопје, Програмската Канцеларија на Советот на Европа во Скопје, до Стејт Департментот преку Амбасадата на САД во земјава и до Европската Комисија во Брисел, во кое изразува загриженост за најавите на парламентарното мнозинство дека подготвуваат пакет закони со кои ќе се распуштат двете уставни и независни категории - Судскиот совет и Советот на јавните обвинители. Од ВМРО-ДПМНЕ, пак реагираат дека оценката за правото со Лога, со СДСМ и со ДУИ е добро позната и оти доаѓа време за одговорност.

-Ценејќи ја Вашата досегашна континуирана поддршка изразена преку многубројните проекти и вложени средства, кои несомнено придонеле за реформските процеси, како и обезбедување на цврсти гаранции на владеење на правото, со вознемиреност и загриженост Ви се обраќам со ова писмо. Во оваа прилика би сакал да Ве информирам и да го насочам Вашето внимание кон најавите за „упад“, кој се подготвува од парламентарното мнозинство во правосудниот систем. Паралелно со најавите за реформа на органите на управата и реорганизација на министерствата, владејачкото мнозинство соопшти дека подготвува и пакет закони со кои ќе се распуштат двете уставни и независни категории – Судскиот совет и Советот на јавните обвинители, пишува Лога во писмото.

Лога во писмото изразува и сериозна загриженост што, како што вели, поставеноста на ваквата концентрација на моќ на трите власти кај една политичка партија ќе значи пресликување на состојбите и проблемите пред 2017 година.

-Ваквите најави се избрзани и опасни, и цениме дека од страна на владејачкото мнозинство треба да се почитува процесот на правилно креирање на политики кое вклучува оценка на состојбите и консултација за сите претстојни обврски и одговорности кои Република Северна Македонија ги има во договор со Европската Унија и останатите меѓународни партнери, потенцирал Лога во писмото кое им го испратил на делегации на меѓународната заедница.

Прашан за став за писмото на Кренар Лога до меѓународната заедница, портпаролот на ВМРО-ДПМНЕ, Наум Стоилковски, денеска на прес-конференција во партиското седиште рече дека Кренар Лога заедно со СДС и со ДУИ се во опозиција.

- Оценката за правото во Македонија со Лога, со СДС и со ДУИ е добро позната и во Македонија и во меѓународната заедница. Кренар Лога заедно со СДС и со ДУИ се во опозиција. Доаѓа време за одговорност, за сите упади во закони во правниот и во судскиот систем, изјави Наум Стоилковски, портпарол на ВМРО-ДПМНЕ. аа/ац/

Фото: МИА архива