Лансирана нова платформа „Западен Балкан КВАД 100% усогласеност со надворешната политика на ЕУ“
- Министерот за надворешни работи Бујар Османи, денеска во Скопје, заедно со министерката за Европа и надворешни работи на Албанија, Ољта Џачка, заменик-министерот за надворешни работи и дијаспора на Косово, Крешник Ахмети и советникот за надворешна политика на премиерот на Црна Гора, Ѓорѓе Радуловиќ лансираше нова платформа „Западен Балкан КВАД - 100% усогласеност со надворешната политика на ЕУ”.
![Лансирана нова платформа „Западен Балкан КВАД 100% усогласеност со надворешната политика на ЕУ“](https://new.mia.mk/index.php/images/20230329100254_big_730x400_92.webp )
Скопје, 29 март 2023 (МИА) - Министерот за надворешни работи Бујар Османи, денеска во Скопје, заедно со министерката за Европа и надворешни работи на Албанија, Ољта Џачка, заменик-министерот за надворешни работи и дијаспора на Косово, Крешник Ахмети и советникот за надворешна политика на премиерот на Црна Гора, Ѓорѓе Радуловиќ лансираше нова платформа „Западен Балкан КВАД - 100% усогласеност со надворешната политика на ЕУ”.
Во фокус на средбата, како што соопштија од МНР, била целосната усогласеност со заедничката надворешна и безбедносна политика на ЕУ на четирите земји од групата КВАД во светло на новата гео-политичка реалност, хибридните закани, енергетската криза и економските последици предизвикани од руската инвазија на Украина.
- По агресијата на Руската Федерација врз Украина, усогласувањето со ЗНБП, но уште пошироко со позициите и вредностите на демократскиот свет, се претвори во еден од најважните приоритети на земјите аспиранти за членство во ЕУ, но и како јасна порака каде овие земји припаѓаат, нагласил министерот Османи на средбата, се наведува во соопштението од МНР.
Тој изразил задоволство од воспоставувањето на неформалниот форум, наречен QUAD/КВАД. Секоја од овие земји поединечно, посочил, се покажа како доверлив партнер на НАТО и ЕУ, со усогласување со режимот на санкции на ЕУ и САД, но и преку конкретна хуманитарна и друга техничка помош за Украина.
Османи ги брифирал соговорниците за претстојните реформи, истакнувајќи дека нема отстапување од европскиот пат за Северна Македонија, земја позната по својата мулти-етничката демократија и кохезија, за што признание претставува и одлуката да биде домаќин на неодамна одржаните разговори меѓу Косово и Србија во Охрид.
На средбата, соопштуваат од МНР, било истакнато дека заедничка стратешка цел на сите земји кои успеале да достигнат потполна хармонизација со одлуките на ЕУ е целосна интеграција во Унијата. Во тој контекст и поврзано со актуелните регионални и меѓународни случувања, процесот на имплементација и спроведување на политиките, регулативата и стандардите на ЕУ претставува највисок државен интерес. цр/дма/
Фото:МНР