Куманово, 30 мај 2022 (МИА) - Ученици и професори од кумановското основно училиште „Браќа Миладиновци“, престојуваа во училиште во Сантрем, Португалија во рамки на Еразмус + проект заедно со други училишта од Европа, информираа денеска од училиштето. Ова е прва мобилност од проектот „Подготви се за иднината“ (Get ready 4 Future) во кој покрај кумановското, вклучени се и основни училишта од Италија, Полска и Португалија. - Проектот „Get ready 4 Future“, цврсто се залага за воведување на нови технологии што ги нуди образованието во европските училишта како и интеркултурална соработка и размена на добри практики за иновативно и интерактивно учење, а со цел надминување на културолошките празнини. Од овие причини одлучено е да се охрабри интересот спрема роботика, како и зголемување на употреба на кодирање, едукативна роботика и дигитални вештини. Методот на кодирање е важен дидактички пристап кој успешно ја зголемува мотивацијата и интересот на учениците за когнитивно учење со рационално поврзување на изучените содржини, изјави професорката од „Браќа Миладиновци“, Ана Гиевска. Учениците и професорите во рамки на проектот, ги спроведуваат активностите преку презентации, бројни работилници, дебати на тема роботика, квизови и игри. - Исто така домаќините се потрудија да ни ги покажат сите убавини на својот град и блиската околина, како и посета на прекрасниот Лисабон, како и Белем и градот Фатима, изјави Гиевска. Училиштето „Браќа Миладиновци“ реализира повеќе европски проекти со цел, учениците да се стекнат со современи, нови методи и  процеси на едукација, но и да и ги прошират пријателствата со врсници од европски држави. ам/мс/