Москва, 19 март 2025 (МИА) - Претседателите на САД и Русија, Доналд Трамп и Владимир Путин, разговарале за можноста за одржување серија хокејски натпревари меѓу двете земји, соопшти Кремљ.

Според Москва, Трамп ја поддржал иницијативата на Путин за организирање натпревари во САД и Русија, со учество на хокејските лиги на двете држави.

Во официјалното соопштение на Белата куќа за разговорот не се спомнува хокејот, а Националната хокејска лига (НХЛ) на САД изјави дека за идејата дознала дури по завршувањето на разговорот.

„Што се однесува до разговорот меѓу претседателите Трамп и Путин, НХЛ не беше дел од тие дискусии и не би било соодветно да даваме коментари во овој момент“, се вели во изјавата на лигата.

Познато е дека рускиот претседател Владимир Путин е страствен љубител на хокејот и често учествува во егзибициски натпревари. Тој беше присутен и на натпреварот меѓу Русија и САД на Зимските олимписки игри во Сочи во 2014 година, кој заврши со победа на Американците по изведување пенали.

Ривалството во хокеј меѓу САД и Русија има децениска традиција, започнувајќи од Олимписките игри во Лејк Плесид во 1980 година, кога американските аматери неочекувано го победија тогашниот моќен советски тим, што стана познато како „Чудото на мразот“. ссм/

фото: ЕПА архива