Скопје, 17 ноември 2022 (МИА) - Ансамблот „Пијано трио“ вечер со почеток во 20:00 часот ќе одржи концерт во Културно-информативен центар - Скопје во рамките на годинашното издание на Есенските музички свечености. Пијано триото постои од 2014 година, а го сочинуваат тројца етаблирани музичари - Татијана Петрушевска Караскаковска на обоа, Марјан Милошевски на фагот и Петар Макариевски на пијано. Она што го карактеризира Триото како состав, се посочува, се истенчен –моќен звук, интерактивост, прецизност во изведбата и виртуозност на музичарите. На програмата се дела од М.Глинка, како и македонските премиери на делата од нашите реномирани композитори Филип Иванов – Prelude & Toccata (2022 ) и “At The Moment” (2022) од Вања Николовски-Ѓумар напишани специјално за „Пијано Трио“. Татијана Петрушевска Караскаковска е прва обоа во оркестарот на НОБ, Марјан Милошевски прв фагот во оркестарот на НОБ и професор по фагот на ФМУ и Петар Макариевски пијано кој е професор – корепетитор на ФДУ. Според членовите на Триото, сите остварени и потврдени уметници со своите инструменти, поттикнати од желба за истражување на нови композиции и зголемување на својот репертоар, формираа ансамбл сметајќи дека постоење на камерни ансамбли од секаков вид е потребно и полезно за музичарите, од аспект на соработка, зголемување на репертоар, изведување дела кои не се само за соло инструмент, туку се во соработка со други инструменти. -Во овој ансамбл имаме обоа и фагот во соработка со пијано, тоа ни овозможува широк спектар на репертоар, на кој има композиции од различни епохи, форми и кои бараат виртуозност во изведбата и се предизвик за изведување. Х.Брод, Т.Лалие, К.Фридеман, В.А.Моцарт, Ф.Пуланк, Г.Ф.Хендл, А.Вивалди, А.Рајхенауер, Л.В. Бетовен, М. Глинка, се дел од композиторите кои се на репертоарот на Триото и кој постојано се збогатува со нови композиции, велат за својата активност тројцата музичари. Како што наведуваат од Дирекцијата за култура и уметност на Град Скопје, првиот свој настап Триото го имаше на концертот и промоцијата на ЦД во чест на флејтистот Илија Зимбо, следуваат концерти во Демир Капија, Куманово, Виница, Скопјe, Kрушево, Прилеп, Гевгелија, Берово, Делчево, Кочани. На својата програма секогаш имаат дела кои се изведуваат премиерно во Македонија, а кои дела и самата изведба на Триото, секогаш наидуваат на одушевување кај публиката. Инаку, делата кои годинава, македонските композитори Вања Николовски-Ѓумар и Филип Иванов, ги напишаа специјално за пијано за Пијано Три, својата светска премиера ја имаа на Фестивалот на камерна музика во Нови Сад – Европски град на култура за 2022 година. вг/мд/