Мајнц, 14 декември 2024 (МИА) - Тренерот на Баерн, Винсент Компани, по првиот пораз на неговиот тим во Бундеслигата, изјави дека неговиот стручен штаб е целосно посветен да ги отстрани недостатоците во играта и да му овозможи на тимот да избегнува вакви ситуации во иднина.

Баерн како гостин остана со празни раце на гостувањето кај Мајнц во 14. коло.

-Честитки до мојот колега Бо Хенриксен и неговиот тим Мајнц за победата. Игравме против расположена екипа која беше подготвена да се бори во секој момент. И го направивме најдоброто што можевме, иако претходно го правевме тоа подобро“, рече Компани и додаде: „Денес не бевме на врвот на своите можности, но тоа не значи дека победата на противникот е помалку импресивна. Овој натпревар е завршен, па поразот ќе го искористиме за да изградиме мотивација за следниот натпревар“.

Баварците поголемиот дел од времето ја имаа топката во свој посед, но не беа толку опасни како и обично. Една од причините за тоа е отсуството на напаѓачот Хари Кејн поради повреда.

-Хари е подобар. Малку недостасуваше да биде подготвен за овој натпревар, а се надевам дека ќе биде на располагање за следниот, изјави Компани.

Следниот натпревар Баерн го игра против РБ Лајпциг во петок од 20:30 часот.

Шампионот Баер Леверкузен со нова победа се доближи на четири бода заостанување. На прашањето за трката за титулата, Компани рече дека неговиот тим не се грижи за работи што не може да ги промени во моментов.

-Тоа е фудбалот, поинтересна е трката за титулата. Не можеме да го промениме фактот дека Мајнц победи, но можеме да влијаеме на исходот на следниот натпревар. Поразот не боли, но веруваме дека можеме подобро во иднина. Гледаме само на претстојниот натпревар - можеме да го добиеме тој натпревар, а оној што веќе заврши и во кој бевме поразени - не, истакна тој.

Баерн е лидер со 33 бодови, додека второпласираниот Баер има 29. дс

Фото: Архива