Ковачевски – Пич: Северна Македонија придонесува во регионалната и европската стабилност
- Премиерот Димитар Ковачевски, придружуван од министерката за одбрана Славјанка Петровска, се сретна со Сер Стјуарт Пич, специјален претставник на Обединетото Кралство за Западен Балкан, придр
![Ковачевски – Пич: Северна Македонија придонесува во регионалната и европската стабилност](https://new.mia.mk/index.php/images/20221114014132_big_730x400_26.webp )
Скопје, 27 октомври 2022 (МИА) - Премиерот Димитар Ковачевски, придружуван од министерката за одбрана Славјанка Петровска, се сретна со Сер Стјуарт Пич, специјален претставник на Обединетото Кралство за Западен Балкан, придружуван од амбасадорот на Обединетото Кралство во земјава, Метју Лосон.
На состанокот, како што соопшти владината прес-служба, е разговарано за актуелни прашања во регионален и глобален контекст, во насока на стабилноста и мирот во Европа и во светот.
-Во таа насока, поздравени се одлуките на Владата што го овозможија почетокот на преговорите и напредокот во евроинтегративниот процес како стратешка цел на Северна Македонија, а од важност за стабилноста и безбедноста и на регионот и на Европската Унија. Нагласена е потребата за фокус на сите политички субјекти во земјава кон политиките на решенија, наместо политиките на блокади и продуцирање недоразбирања, посебно со земање предвид на актуелниот глобален безбедносен политички контекст, се вели во соопштението за средбата помеѓу Ковачевски и Пич.
Притоа, оценета е како значајна поставеноста на надворешната политика на Северна Македонија, на линија на политиките на државите од Европа, во однос на ситуацијата во Украина и придонесот на нашата држава, преку политиките на пријателство и дијалог, во регионалната стабилност.
-Воедно се изразени честитки за потпишаниот договор ФРОНТЕКС, вчера во Скопје, на чист македонски јазик, со што се потврдени признавањето и почитта кон македонскиот јазик и македонскиот идентитет, од Европската Унија, велат од Владата.
Оттаму информираат дека премиерот Ковачевски се заблагодарил за сета поддршка од Обединетото Кралство, којашто е од исклучително значење во демократските, интеграциските, реформските и сите други процеси, значајни за граѓаните на нашата држава.
Обединетото Кралство, како што е соопштено, е голем стратешки партнер и пријател на Северна Македонија и во таа насока продолжува да се унапредува соработката.
Оценета е како важна соработката помеѓу Северна Македонија и Обединетото Кралство во рамки на членството во НАТО, со изразена определба за натамошно унапредување.
На средбата е разговарано и за предизвиците во енергетската област, како последица од војната во Украина и се разгледани можности за одржливи решенија на овој план, како во нашата држава, така и околу таквата потреба и на другите држави од Европа. сст/дма/
![Ковачевски Пич](/articles/images/%d0%ba%d0%be%d0%b2%d0%b0%d1%87%d0%b5%d0%b2%d1%81%d0%ba%d0%b8-%d0%bf%d0/UAgBJ1TIp/placeholder.webp?use_watermark=0)