- Најпрво да ви го честитам Светскиот ден на детето. Оваа година Светскиот ден на детето практично се поклопува со започнувањето на Светското првенство во фудбал и во тој фудбалски дух и тимска енергија би сакал да порачам дека ние ќе сме силни како заедница, сѐ додека како едно семејство се грижиме за оние кои ја преставуваат иднината на нашата земја – децата, порача премиерот во обраќањето.

Според Ковачевски, последниве неколку години беа навистина полни со предизвици - КОВИД пандемијата, економската криза, војната во Украина, енергетската криза, и сето тоа, како што рече, остави огромни последици, врз семејствата, но и врз децата. - Децата и младите беа според мене најпогодени од КОВИД кризата. Навистина целосно им се измени и учењето и другарувањето, им се измени животот. Воопшто не беше лесно да си дете тогаш, но ние и тогаш и денес одбираме да излеземе како победници од сите потешкотии низ кои минуваме, додаде Ковачевски. Тој напомена оти цврсто верува дека предизвиците нѐ прават посилни и дека кога пловиме по немирни води, постигнуваме успеси само со храбар и проактивен однос кон животот. - Ваквиот приод сакаме да им го пренесеме и на најмладите и на овој ден гласно да им порачаме и самите да бидат гласноговорници и застапници на своите права. Светскиот ден на детето е нашиот потсетник за обврските што како општество ги имаме кон нашите деца, особено оние чија положба е многу чувствителна, потенцираше премиерот. На настанот обраќања имаа и претставничката на УНИЦЕФ, Патриција Ди Џовани и директорот на ФФМ, Дени Масев, по што се одржа пријателски фудбалски натпревар. бт/сп/