Скопје, 2 мај 2024 (МИА) - Лидерот на СДСМ Димитар Ковачевски не го оправдува зголемувањето на цената за осигурување на автомобилска одговорност, а од Стопанската комора на северозападна Македонија велат дека се против централизирање на цените во која и да било дејност. 

По денешната средба со Стопанската комора на северозападна Македонија, Ковачевски упати одговорите да се бараат кај надлежните институции.

- Постои регулаторно тело што се вика Агенција за осигурување која практично ги регулира цените и дополнително на тоа Министерството за финансии исто така учествува во регулирањето на цените на осигурителните полиси. За тоа врз основа на кои калкулации е направено тоа зголемување, што не го оправдувам јас и тоа сакам да биде јасно наведено, може да ви одговори министерот или заменик министерот за финансии или кој било друг задолжен во соодветните сектори во Министерството за финансии или во Владата, изјави Ковачевски.

Претседателот на Стопанската комора на северозападна Македонија, Менди Ќура рече дека како бизнис заедница се против централизирање на цените во која и да било дејност.

- И порано сме биле против тоа да се централизираат цените и сум против секаков вид на ваква централизација. Новите цени колку што знам се вратија назад и не се нови. Ние не ги поддржуваме, значи ние сакаме – нека се нови цени, но нека е слободен пазар, иако имаат тие посебен третман колку што знам јас. Слободниот пазар треба да делува и слободниот пазар треба да одреди цена, посочи Ќура.

Од Агенцијата за супервизија на осигурување (АСО) денеска преку соопштенија ја повикаа Владата, согласно своите законски надлежности, да ги заштити правата на осигурениците и преку измени во Тарифникот да ги намали цените на полисите за задолжително осигурување од автомобилска одговорност.

 - АСО како регулатор на пазарот на осигурување уште еднаш јавно информира дека е целосно неоправдан и без основа потегот со кој осигурителните компании ги зголемија цените на осигурувањето од задолжителна автомобилска одговорност. Клучните аргументи против зголемување на цената се наведени во анализата што е доставена до надлежната комисија при Министерството за финансии. Зголемувањето на цената на осигурувањето не е во функција на јакнење на заштитата на осигурениците. Напротив, ова зголемување на цените е само и исклучиво во функција на покривање на трошоците за оперативно работење на компаниите за осигурување, информираа од АСО. бак/лв/

Фото: МИА архива