Скопје, 3 јануари 2025 (МИА) - Во издание на издавачката куќа „Изида“ од Софија објавена е книгата раскази „Мајсторот“ од Димитар Башевски. Преводот од македонски на бугарски јазик е на Тања Попова.

- Димитар Башевски го води читателот на книжевно патување низ длабоките слоеви на човечките емоции и вечните потраги. Со екстремна леснотија и чувство за јазични нијанси, авторот слика живописни слики на љубов, страст и копнеж кои се испреплетени со огромните прашања за смислата на животот и човечкото место во светот, се наведува во текстот кон објавената книга. 

Ова е трета книга од Башевски објавена во Бугарија. Претходно објавени се неговите романи „Бунар“ и „Круг“. 

Башевски е автор на дваесетина книги проза и поезија. Добитник е на највисоките книжевни и општествени награди во земјата. Неговите книги се преведувани и објавувани на повеќе европски јазици. мд/бак/

Фото: МИА атрхива