Кина ја осуди изјавата на Бајден за американско бранење на Тајван при кинеска интервенција
- Пекинг го осуди, како што наведе портпаролката на кинеското Министерство за надворешни работи Мао Нинг, „сериозното прекршување“ на дипломатските ветувања на Вашингтон
![Кина ја осуди изјавата на Бајден за американско бранење на Тајван при кинеска интервенција](https://new.mia.mk/index.php/images/20221113223237_big_730x400_32.webp )
Пекинг, 19 септември 2022 (МИА) - Кина денеска ја осуди изјавата на американскиот претседател Џо Бајден, дека САД ќе го бранат Тајван во случај на кинеска интервенција.
Пекинг го осуди, како што наведе портпаролката на кинеското Министерство за надворешни работи Мао Нинг, „сериозното прекршување“ на дипломатските ветувања на Вашингтон.
- Ова е сериозно прекршување на важните обврски на САД да не ја поддржуваат независноста на Тајван. Тоа испраќа погрешен, сериозен сигнал (за поддршка) на сепаратистичките сили што водат кампања за независност на Тајван, изјави таа.
Во интервју за Си-би-ес, на прашањето „дали Американците би го бранеле Тајван во случај на кинеска инвазија“, Бајден одговори со „да, доколку би дошло до напад без преседан“.
Бајден нагласи и дека „не го охрабрува“ островот да прогласи формална независност.
- Тоа е нивна одлука, додаде американскиот претседател. бд/јт/