Пекинг, 10 април 2025 (МИА) - Кинеската агенција за атомска енергија и Меѓународната агенција за атомска енергија (МААЕ) се согласија да ја продлабочат соработката на полето на нуклеарната технологија за да го поддржат одржливиот развој на глобалниот југ.

Двете страни денеска потпишаа клучни договори во кои се наведени плановите за соработка во следните пет години.

Кина и МААЕ ќе ги зголемат заедничките напори во критичните области, вклучително и нуклеарната безбедност, земјоделството, здравјето и научните истражувања во областа на нуклеарната енергија. Покрај тоа, Кина ќе ги користи своите истражувачки институти и универзитети за обука на специјалисти за земјите од глобалниот југ, со што ќе се зајакне глобалниот менаџмент и размената на персонал во регионот.

Директорот на кинеската агенција за атомска енергија, Шан Жонг, рече дека Кина е ангажирана во соработка со МААЕ за промовирање на поправеден, поинклузивен и добро планиран развој на нуклеарната енергија, за да се даде поголем бенефит за употребата на нуклеарната технологија за мирољубиви цели и за Глобалниот југ да може да има поголеми предности во сферата.

Генералниот директор на МААЕ, Рафаел Гроси изрази задоволство од достигнувањата на Кина во развојот на нуклеарната енергија и примената на нуклеарната технологија, како и подвлекување на нејзината улога во унапредувањето на глобалното управување со нуклеарната технологија.

Тој рече дека Меѓународната агенција за атомска енергија е подготвена да ја зајакне својата соработка со Кина и да работи заедно на целите за одржлив развој на ОН. рп/

Фото: МИА архива