Качински: Нема преговори додека 20 отсто од Украина е под руска окупација
- Лидерот на полската владејачка конзервативна партија Право и Правда, Јарослав Качински, предупреди дека не може да има мировни преговори се додека Русија окупира 20 отсто од територијата на Украина и дека поставувањето какви било услови за Украина значи само помагање на Русија.
![Качински: Нема преговори додека 20 отсто од Украина е под руска окупација](https://new.mia.mk/index.php/images/20230303102856_big_730x400_55.webp )
Варшава, 3 март 2023 (МИА) - Лидерот на полската владејачка конзервативна партија Право и Правда, Јарослав Качински, предупреди дека не може да има мировни преговори се додека Русија окупира 20 отсто од територијата на Украина и дека поставувањето какви било услови за Украина значи само помагање на Русија.
Качински, кој во моментов не извршува никаква друга функција освен лидер на партија, но има поголемо влијание од премиерот и претседателот на државата, нагласи дека национален интерес на Полска е Украина да не биде поразена.
„Русија окупира 20 отсто од територијата на Украина и Украинците не можат да прифатат таква загуба. Враќањето на териториите е услов за фер преговори. Се разбира, би било добро Русите едноставно да се повлечат и потоа да започнат преговорите. Но, веројатно на тоа не може да се смета и ќе биде неопходно да се вратат тие територии со оружје во рака“, рече Качински синоќа во интервју за полската државна радио и телевизија.
„Падот на Украина би бил огромна опасност за нас и во тој поглед треба да се направи се за таа да не биде поразена. Во границите на нашите можности и секако во соработка со нашите сојузници“, рече Качински. паг/