Скопје, 18 март 2022 (МИА) - Поради поголем интерес во јавноста за помилувањата што беа објавени вчера, Кабинетот на претседателот Стево Пендаровски појаснува дека лицето Абдуљфета Алими, кој има добиено делумно ослободување од понатамошно извршување на неиздржаниот дел од казната затвор во траење од осум месеци, ги има исполнето условите предвидени со Законот за помилување и воспоставената пракса. Во врска со помилувањето на Александар Петровски, во денешното соопштение се појаснува дека потполно се ослободува од понатамошно извршување на казната затвор, бидејќи станува збор за граѓанин со тешка и животнозагрозувачка здравствена состојба. Од кабинетот на Пендаровски велат дека не станува збор за повратник од странски боишта.

- Помилувањата како институт се еден од основните уставни надлежности на претседателот. Постојат два вида на помилување, и тоа редовни, односно кога лица и граѓани на земјава индивидуално испраќаат Молби за помилување до Министерството за правда, кои потоа се доставуваат до Кабинетот на претседателот, односно Комисијата за помилување која детално ги разгледува и потоа му доставува предлози на претседателот, а групните помилувања се втора категорија и за нив постапката се одвива двапати годишно, за 2 Август - Илинден, и новогодишните празници. За групните помилувања, предлозите до Министерство за правда пристигнуваат од казнено-поправните домови, а не по индивидуални барања на лицата кои отслужуваат казна, се вели во соопштението на Кабинетот на претседателот Пендаровски.

Потоа, појаснуваат од Кабинетот, исто како и за редовните, предлозите ги доставува Министерството за правда до Комисијата за помилување на претседателот, којашто доставува мислење до шефот на државата поединечно за секој од случаите. Претседателот согласно своите уставни надлежности ја носи конечната одлука.

- Основните предуслови за едно лице да биде помилувано, се во насока на добро поведение, да покажал каење за стореното дело, да почне со отслужување на казната, да не станува збор за повторник или лице кое има повеќе дела за кои треба да одговара и во иднина. Потенцираме дека за одредени кривични дела не е возможно да се бара помилување. Секој случај се разгледува поединечно. Во однос на предметите опфатени со последната одлука за помилување на осудени лица, Комисијата за помилување даде позитивен предлог, појаснуваат од кабинетот на Пендаровски.

Помилувањето, велат од Кабинетот, е институт кој има корективна функција. Дејствата кои ги предизвикува помилувањето се овозможување и забрзување на ресоцијализацијата на осудените лица а со тоа и остварувањето на целите на казнувањето и извршувањето на казната.

- Претседателот Пендаровски, во текот на неговиот мандат потполни помилувања има дадено само во ситуации кога граѓаните кои ги бараат се во животнозагрозувачка здравствена состојба. Потенцираме дека, претседателот Пендаровски најчесто дава делумни помилувања односно 3 - 8 месеци, и тоа во случаи кога граѓаните кои бараат помилување имаат за отслужување уште неколку години од казната, и кога во нивните случаи биле  исполнети горенаведените предуслови, информираат од кабинетот на Пендаровски. сст/