Берлин, 11 ноември 2024 (МИА) – Единствениот преостанат коалициски партнер на германскиот канцелар Олаф Шолц, Партијата на зелените, денеска соопшти дека ќе прифати порано гласање за доверба на владата во парламентот, што ќе доведе до предвремени избори.

Со ова Зелените им се приклучија на опозициските партии кои бараат од германскиот канцелар да го реши прашањето оваа недела.

Социјалдемократот Шолц првично планираше да свика гласање за доверба на 15 јануари, што е прв чекор според германските уставни правила за да се поттикнат нови избори откако неговата трипартиска коалиција се распадна минатата недела. Се очекува кабинетот составен од коалиција од две партии логично да го загуби гласањето за доверба во парламентот.

Но, коалициските партнери на Шолц, Зелените, им се придружија на нивните поранешни сојузници, неолибералните Слободни демократи (ФДП) и опозициските конзервативци, барајќи Шолц да дејствува побрзо.

- Очекуваме да разјасни се оваа недела, рече колидерката на Зелените, Рикарда Ланг, на прес-конференција, додавајќи дека парламентарното време што останува пред изборите треба да се посвети на итните задачи, а не на продолжување на законодавната програма на старата коалиција.

Коалицијата на Шолц го загуби парламентарното мнозинство минатата среда кога ФДП се повлече поради инсистирањето на нејзиниот партнер социјалдемократите на Шолц, да ги зголеми трошоците, користејќи државни заеми доколку е потребно.

Двопартиската владејачка коалиција сега се потпира на опозициските партии за да усвои закони, вклучително и буџетот за 2025 година, што изгледа малку веројатно.

Шолц вчера сигнализираше подготвеност да побара гласање за доверба во Бундестагот пред Божиќ доколку лидерите на парламентарните партии одлучат дека тоа е неопходно. јт/