Италијанската премиерка Мелони денеска ќе ги посети прифатните центри за мигранти во Албанија
- -Двајцата премиери ќе ја посетат и поранешната воена база Ѓадр, каде се уште се работи на уредувањето, а во која ќе бидат сместени три илјади мигранти месечно, односно 36 илјади годишно, каде ќе чекаат одговор на барањата за азил, објави Топ чанел.
![Италијанската премиерка Мелони денеска ќе ги посети прифатните центри за мигранти во Албанија](https://new.mia.mk/index.php/images/20240605070233_big_730x400_19.webp )
Тирана, 5 јуни 2024 (МИА) - Премиерката на Италија, Џорџа Мелони, денеска ќе престојува во официјална посета на Албанија, поточно во округот Лежа, каде се двата прифатни центри за мигранти.
Според кабинетот на албанскиот премиер Еди Рама, Мелони со поголема група новинари на пладне ќе допатува во пристаништето Шенѓин, каде ќе биде центарот за прием на мигрантите, кој е целосно подготвен за тоа.
-Двајцата премиери ќе ја посетат и поранешната воена база Ѓадр, каде се уште се работи на уредувањето, а во која ќе бидат сместени три илјади мигранти месечно, односно 36 илјади годишно, каде ќе чекаат одговор на барањата за азил, објави Топ чанел.
Предвидено е да одржат и заедничка прес-конференција.
Рама и Мелони на 6 ноември 2023 година во Рим потпишаа договор за прифаќање на мигрантите, кои требаше да профункционираат на 20 минатиот месец, но поради доцнењето на работите тоа не се случи.
Времетраењето на договорот е со важност од пет години, но тој може автоматски да се продолжи за уште пет години доколку една од страните, најмалку шест месеци пред истекот на датумот, не побара да не се обновува истиот.
Според договорот сите трошоци ќе ги сноси Италија и тие за 5 години ќе изнесуваат 650 милиони евра. вт/сд/
Фото: принтскрин