Исчистени и затворени дивите депонии во три села во општина Чешиново-Облешево
- Исчистени и затворени се три нелегални депонии за комунален и друг вид отпад на територијата на општина Чешиново-Облешево, а локациите се уредени и вратени во претходната состојба.
![Исчистени и затворени дивите депонии во три села во општина Чешиново-Облешево](https://new.mia.mk/index.php/images/20230419122551_big_730x400_85.webp )
Кочани, 19 април 2023 (МИА) – Исчистени и затворени се три нелегални депонии за комунален и друг вид отпад на територијата на општина Чешиново-Облешево, а локациите се уредени и вратени во претходната состојба.
По неодамнешното расчистување на локацијата кај селото Чифлик, што жителите ја користеа за исфрлање отпад, слични активности се реализираа и кај селата Спанчево и Чешиново, каде повеќегодишните диви депонии веќе не се во функција.
Од Општина Чешиново-Облешево истакнаа дека со механизција целосно е исчистен и дислоциран отпадот, а просторите се преуредени. На местата каде што имаше купишта ѓубре, нанесен е слој од земја, а локациите се израмнети и средени.
Чистењето на отпадот и затворањето на дивите депонии ќе продолжи и во другите населени места во општината. Локалната самоуправа упати јавен повик до граѓаните да ги почитуваат забраните за исфрлање отпад од домаќинствата и заеднички да се грижат за чистата и здрава животна средина.
Расчистувањето на дивите депонии на територијата на општина Чешиново-Облешево е дел проектот за изградба на регионални депонии во државата, со кој треба да се реши проблемот со загадувањето на животната средина.
Слични активности се почнати и во општините Кочани и Виница, за што веќе е избрана фирмата „Ескаватори МК“, која ја презема обврската да го спроведе расчистувањето и уредувањето на дивите депонии во Источниот плански регион. та/цр
фото: Општина Чешиново-Облешево