Скопје, 30 декември 2020 (МИА) - Предметот историја не се укинува. Новиот концепт ја дава рамката според која се планира основното образование и документот не брише содржини од наставните предмети, ниту, пак, предвидува менување на содржините од предметот историја, рече владиниот портпарол Душко Арсовски. На новинарско прашање по редовната прес-конференција, тој одговори дека наставниот предмет историја останува задолжителен од интегрираната наставна програма по општествени науки и дека интегрираното изучување на историјата и географијата, како што рече, е карактеристично за најголемиот дел земји од развиениот свет и развиените образовни системи. - Се предвидува интегрирање содржини од повеќе предмети. Со интегрирањето се овозможува изучување по теми. Концептот е само рамка којашто првично претставува како ќе изгледа реформата. Наставните програми ќе се прават откако ќе се донесе рамката. Ова е процес во кој се вклучуваат сите чинители, додаде портпаролот на Владата. хс/ац/