Бејрут, 2 ноември 2024 (МИА) - Вооружени групи од Ирак поддржани од Иран се распоредени во Сирија за да ја поддржат владината контраофанзива против ненадејниот напредок на бунтовниците кои го зазедоа градот Алепо, соопштија денеска претставници на ирачките групи.

Бунтовниците, предводени од џихадистичката група Хајат Тахрир ал-Шам, минатата недела го нападнаа Алепо и се распоредија во околината на Идлиб и соседните провинции Хама. Владините трупи формирале одбранбена линија во северниот дел на Хама во обид да ги запрат бунтовниците.

Иранскиот министер за надворешни работи Абас Арагчи вчера во Дамаск се сретна со сирискиот претседател Башар ал Асад и ја најави целосната поддршка на Техеран за неговата влада.

- Јасно ја најавив целосната поддршка на Исламската Република Иран за претседателот Асад, владата, војската и народот на Сирија, изјави Арагчи.

Според Сириската опсерваторија за човекови права, организација која ги следи конфликтите, околу 200 ирачки паравоени борци влегле во Сирија преку преминот Боу Камал. Се очекува тие да бидат распоредени во Алепо за да ја поддржат сириската војска.

Сириските и руските воздушни напади врз позиции на бунтовниците продолжуваат, главно во провинциите Хама и Идлиб. Сириската цивилна одбрана во областите под контрола на бунтовниците соопшти дека најмалку 10 цивили биле убиени во градот и провинцијата Идлиб.

Курдите од Сирија масовно побегнаа од борбите откако бунтовниците поддржани од Турција го зазедоа Тел Рифат од ривалските курдски власти поддржани од САД. Курдските сили главно се повлекоа и повикаа на хуманитарен коридор за да се овозможи безбедно евакуирање на населението кон Алепо и понатаму кон североисточните региони под курдска контрола. ссм/

фото: ЕПА