Техеран, 19 јуни 2023 (МИА) – Иранските власти денеска соопштија дека околу 20 земји биле вклучени во протестното движење што почна во септември минатата година по смртта на младата Иранка, Махса Амини, а „меѓу земјите се споменуваат Албанија и Косово“.

Истрагите на разузнавачките служби на Револуционерната гарда покажуваат дека во протестите учествувале разузнавачките служби на околу 20 земји, изјави иранскиот генерал Мохамад Каземи.

Иранските власти протестите ги нарекоа „немири“ поттикнати од земји и организирани од непријателски настроени земји кон Иран.

Генералот Каземи ги посочи САД, Велика Британија, Обединетите Арапски Емирати, Саудиска Арабија, Франција, Германија, Канада, Белгија, Австрија, Албанија, Австралија, Исланд, Италија, Косово, Норвешка, Бахреин, Нов Зеланд и Израел.

Тој додаде дека наведените земји користеле неевропски државјани како Авганистанци, Пакистанци и Ирачани за да „соберат информации за состојбата на немирите“.

Неколку стотици луѓе загинаа за време на протестите по смртта на Амини, со курдско потекло. Таа почина во притвор откако беше уапсена поради кршење на строгиот кодекс на облекување на жените во Иран. ми/

фото: ЕПА