Скопје, 19 март 2024 (БТА)

Информациите ги поврзуваат луѓето, но информациите знаат да ги поделат луѓето. Ова го изјави на Третата прекугранична конференција за проектот „Европа на Балканот: Заедничка иднина“ во прес-клубот на Бугарската телеграфска агенција (БТА) во Скопје, генералниот директор на државната информативна агенција во Северна Македонија - МИА, Драган Антоновски.

Ова е веста, која денеска ја избра МИА од сервисот на Бугарската телеграфска агенција (БТА), согласно Договорот за размена на информации и професионална соработка, кој предвидува секој ден националните информативни агенции на Северна Македонија и Бугарија да разменуваат по една вест, која ќе ја објават на својот интернет сајт без промени со изрично посочување и цитирање на партнерот како извор.

Како професионалци во областа на информациите, знаеме дека иако можеме да произведуваме професионални информации, можеме да произведуваме и дезинформации. Значи професионализам, а не информираност, професионално етичко покривање - тоа е суштината, истакна Антоновски.

Според него, со секоја информација може да се манипулира. Затоа агенциите се столбот на создавање на професионални, фактички точни информации, на оваа комуникација, за да се зближиме едни до други, да дознаеме повеќе едни за други. Затоа што обично кога не ги знаеш работите, тогаш имаш терен за дезинформации, рече и Антоновски.

Проектот „Европа на Балканот: Заедничка иднина“ го спроведува БТА со поддршка на Европската комисија и се надоврзува на веќе спроведениот проект „Европа во Бугарија: Заедничка иднина“. Меѓу целите на проектот се: подобро разбирање на улогата на кохезионата политика, вклучително и на Балканот; подигање на свеста за проектите финансирани од ЕУ преку Кохезионата политика; промовирање на отворен дијалог за резултатите од нејзиното спроведување на локално ниво, како и граѓанско учество во прашања поврзани со кохезионата политика. Ова е уште еден проект по „Европа во Бугарија: Заедничка иднина“, реализиран од БТА.

Почетокот на серијата конференции за проектот беше означен на 20 декември минатата година во Софија. Првата регионална конференција за проектот се одржа на 16 јануари во Русе, на која градоначалниците и експертите разговараа за новитетите за периодот 2021-2027 година и за постигнатите резултати во периодот 2014-2020 година. Следниот ден, БТА беше домаќин на првата прекугранична конференција Букурешт-Русе. Прекугранична конференција за проектот се одржа и во Едрене и Хасково.

Досега, конференции се одржани и во градовите Разград, Велико Трново, Силистра, Габрово, Бургас, Сливен, Јамбол, Казанлак, Благоевград, Стара Загора. Во периодот до август 2024 година, БТА ќе организира дискусии во своите прес-клубови во Варна, Видин, Враца, Добрич, Крџали, Ловеч, Монтана, Пазарџик, Перник, Плевен, Пловдив, Самоков, Смолјан, Софија, Трговиште, Хасково и Шумен, како и прекугранични конференции во Белград, Босилеград и во Солун.

Фото: БТА

Медиумската информативна агенција овие текстови ги објавува во оригинална форма, согласно Договорот за размена на информации и професионална соработка меѓу двете национални новински агенции МИА и БТА