Џакарта, 11 ноември 2024 (МИА) - Индонезија денеска соопшти дека не ги признава претензиите на Кина во Јужното Кинеско Море, иако потпиша договор за заеднички развој со Пекинг, при што беше предупредено дека овој договор може да ги загрози суверените права на земјата.

Кина одамна има територијални спорови со своите соседи од Југоисточна Азија во Јужното Кинеско Море, за кое таа речиси целосно претендира. Нејзините претензии се засноваат на стари карти, според кои ексклузивните економски зони на неколку земји во регионот се кинески територии.

Во 2016 година, арбитражен суд пресуди дека кинеските претензии не соодветствуваат со меѓународното право. Кина, сепак, одбива да ја признае оваа одлука, пренесува БТА.

Во соопштението дадено за време на посетата на индонезискиот претседател Прабово Субианто во Пекинг, беше споменато дека двете земји постигнале важно заедничко спогодбено решение за развој во области со преклопени претензии.

Министерството за надворешни работи на Индонезија постојано изјавува дека земјата нема претензии во Јужното Кинеско Море и дека нема преклопена јурисдикција со Кина, додавајќи дека документот нема да влијае врз суверените права на Индонезија.

Врз основа на старите карти, Кина има претензии врз исклучителните економски зони на Брунеј, Малезија, Филипини и Виетнам. Во спорните подрачја има патроли на кинеската крајбрежна стража, која е обвинувана од соседните држави за агресија и обиди за нарушување на енергетските и риболовните активности во водите на исклучителните економски зони на регионот. Кина обично тврди дека нејзините бродови спречуваат навлегувања на нејзина територија.

Некои индонезиски аналитичари предупредија дека потпишувањето на ваков договор може да има последици и да се протолкува како промена на позицијата. ссм/

фото: архива