Скопје, 6 мај 2022 (МИА) - Факултетот за ликовни уметности при Универзитетот „Св. Кирил и Методиј“ во Скопје и Фондацијата „Драгутин Аврамовски-Гуте“, јубилејно по 35-ти пат ја организираат изложбата „Студентска графика - Драгутин Аврамовски-Гуте“. Изложбата ќе биде отворена вечер во галеријата на Факултетот за ликовни уметности (ФЛУ). На отворањето ќе биде доделена наградата за најуспешно графичко дело реализирано во академската 2021/2022 година, како и пофалници за студентите чии дела влегоа во потесната селекција. Изложени ќе бидат и плакати дизајнирани за годинашната изложба од страна на студентите од трета и четврта година, кои ја посетуваат наставата на модулот Графички дизајн. Традиционално, наградата за најдобро изведено графичко дело во академската 2020/21 година подразбира доделување на диплома и еднократна парична награда од семејната Фондација „Драгутин Аврамовски -Гуте“, како и диплома и можност за самостојно претставување во текот на следната академска година во галериите на ФЛУ. По повод јубилејот, фондацијата „Драгутин Аврамовски – Гуте“ од оваа година го збогатува наградниот фонд со втора и трета награда и со стипендии за следната академска година за наградените студенти. Фондацијата „Драгутин Аврамовски-Гуте“ ја доделува истоимената награда од 1988 година, кога првпат постхумно е доделена, во чест на еден од основачите на Катедрата по графика. мд/сп/