Излезе од печат „Скопје во високата зона“ од Калина Малеска
- Излезе од печат збирката раскази „Скопје во високата зона“ од Калина Малеска, како ново издание во популарната едиција „Проаза“ на издавачката куќа Или-Или.
![Излезе од печат „Скопје во високата зона“ од Калина Малеска](https://new.mia.mk/index.php/images/20221108220310_big_730x400_48.webp )
Скопје, 8 ноември 2021 (МИА) - Излезе од печат збирката раскази „Скопје во високата зона“ од Калина Малеска, како ново издание во популарната едиција „Проаза“ на издавачката куќа Или-Или.
Дизајнот на корицата, како што соопшти издавачката куќа, го изработи Марија Смилевска, а излегувањето на книгата финансиски е потпомогнато од Град Скопје.
- „Скопје во високата зона“ се состои од раскази кои, низ четири циклуси, сосредоточени на различни визии што временски и просторно се шират во и околу Скопје, истражуваат различни потенцијални начини на постоење и доживување на искуствата, како можност за трансформирање на постоечките перспективи и светогледи. Разнородни по структурата и наративните методи, расказите содржат утописки, дистописки елементи, реинтерпретација на постоечки бајки, лични доживувања, како и слики на специфични моменти од животот, наведуваат од Или-Или.
Калина Малеска е авторка на три збирки раскази: Недоразбирања (Македонска книга, 1998), Именување на инсектот (Слово, 2008) и Мојот непријател Итар Пејо (Или-Или, 2016), романите Бруно и боите (Слово, 2006) и Призраци со срмени нишки (Слово, 2014), драмата Случка меѓу настани: Хипатија од Александрија (Слово, 2010), книгата за деца Арно ама (Или-Или, 2018) и книжевната студија Облици на моќ во современата книжевност (Или-Или, 2020).
Малеска е професорка по англиска книжевност на Филолошкиот факултет „Блаже Конески“ при УКИМ во Скопје, а нејзини статии поврзани за книжевни истражувања се објавени во домашни и меѓународни списанија. Се занимава и со книжевни преводи, а некои од делата што ги превела се: Тристрам Шенди од Лоренс Стерн, раскази од Амброуз Бирс, Волшебникот од Оз од Л. Френк Баум. мс/сп/
![Калина Малеска](/articles/images/%d0%b8%d0%b7%d0%bb%d0%b5%d0%b7%d0%b5-%d0%be%d0%b4-%d0%bf%d0%b5%d1%87%d/dAq1Mh0D4/placeholder.webp?use_watermark=0)