Тетово, 4 март 2026 (МИА) - Во Тетово денес се одржа информативна сесија насловена „Фер ангажман“ посветена на примената на Законот за работно ангажирање на лица.

Законот кој беше усвоен во мај 2025, а почна со примена во јануари 2026 година овозможува веќе вработени луѓе или пензионери да се ангажираат за привремени, сезонски или повремени работи во одредени сектори како земјоделство, угостителство и туризам, лични и домашни услуги, градежништво.

Министерот за економија и труд Бесар Дурмиши истакна дека фер ангажман значи дека работникот добива легален приход, уплатени придонеси за пензиско инвалидско осигурување и здравствена заштита во случај на повреда при работа.

- Невработените лица не ги губат своите права, ниту корисниците на социјалната заштита, минималниот надоместок по час е врзан за минимална плата и не може да биде понизок од законскиот минимум. Истовремено поставивме јасно ограничување за да спречиме злоупотреби. Ова не е замена за редовно вработување, туку инструмент за сезонски повремени потреби со јасно дефинирани рокови лимити и инспекциски надзор. Нашата цел е едноставна повеќе формална економија, повеќе заштитни работници и посилни бизниси, изјави министерот Дурмиши.

Тој наведе примери за Тетово, оценувајќи дека угостителството е еден од клучните сектори каде може да има ангажирање на сезонски и повремен кадар како келнери, готвачи, шанкери доставувачи и друг персонал со јасно утврдени правила.

- Објектите може истовремено да ангажираат до 10 лица и до 10 проценти од вкупниот број вработени преку целосно електронска постапка. Во земјоделството овозможуваме сезонско ангажирање до 180 дена годишно што е особено важно за Полошкиот Регион во дејностите на домаќинството се создава можност за легално ангажирање за чување на деца, грижа за стари лица и одржување, истакна министерот.

Според градоначалникот на Тетово, Биљал Касами, овој закон како значајна структурна реформа, јасно ги регулира работните односи и директно влијае за развојот на локално ниво.

- Законот носи поедноставен и пофункционален пристап преку електронскиот систем за е-работа, но неговата суштина е подлабока. Тој прецизно ги утврдува правата и обврските на страните, ги регулира даночните аспекти и придонесите за социјално осигурување и, најважно, гарантира зачувување на стекнатите права како што се пензискиот стаж, статусот на студент и социјалната заштита. Со тоа се создава правна сигурност за работникот и предвидливост за работодавачот. За град како Тетово, со разновидна економија, сезонските и привремените ангажмани се секојдневна реалност. Затоа, правилната примена на овој закон значи намалување на неформалната економија, зголемување на фер конкуренцијата и воспоставување еднакви стандарди за сите, рече Касами.

Присутните на информативната сесија имаа можност да слушнат за конкретната примена на законот, процедурите за електронска регистрација и одјава, одговори на прашања поврзани со правата и обврските. ас/вј/

Фото: МИА