Заев најави брзо утврдување на причините за пожарот, изрази сочувство до семејствата на починатите
Скопје, 8 септември 2021 (МИА) - Премиерот Зоран Заев изрази сочувство до семејствата за починатите во пожарот што избувна во Ковид центарот во Тетово и им посака брзо оздравување на повредените.
Најави брзо утврдување на причините за пожарот за што, како што напиша на Фејсбук, веќе на терен работат правосудните органи.
- Огромна трагедија се случи во тетовскиот КОВИД-19 центар. Експлозија предизвикала пожар. Пожарот е изгаснат, но згаснаа и многу животи. Борбата за живот трае сѐ уште, a сите служби реагираа пожртвувано и спасуваат луѓе. Изразувам најдлабоко сочуство до семејствата и блиските на починатите и посакувам брзо закрепнување на повредените. Причините за пожарот ќе бидат утврдени, за што правосудните органи се веќе на терен. Ова е навистина трагичен настан и можам да ве уверам дека целиот државен врв е посветен на брзо разрешување на оваа ситуација. Во моментов трае кризниот штаб во Општина Тетово, напиша Заев на Фејсбук. бак/дма/
