Гевгелија, 6 ноември 2021 (МИА) - Со пригодни манифестации денеска граѓаните го чествуваа општинскиот празник - 6 Ноември, Денот на ослободувањето на Валандово. Претставници од локални и државни институции, локални ограноци на политички партии и претставници од здруженија на граѓани, во градскиот парк положија цвеќе пред споменикот на 34 борци загинати во НОБ за слободата на Валандово. -НОБ е темелот на денешното слободно и демократско Валандово и основата на се што ќе постигнеме во иднина. Целиме кон заедница на рамноправни граѓани, силни пријателства и големи срца. Сакаме општина отворена кон светот, обединета во намерите и посветена на сопствениот развој, рече градоначалникот Перо Костадинов. Дел од прославата на празникот денеска беше и одржувањето на традиционалната „Ракијада“, настан од голема културолошка важност за Валандово, кој ја отсликува посебноста на заедницата и валандовската семејна традиција. Годинава во варење на ракија се натпреваруваа 20 тимови составени од по двајца членови. Според жири комисијата, најдобра ракија направија Ѓорги Пандев и Никола Смиланов, на кои им припадна првото место, пред второпласираните Марјан Ташков и Слободан Џилвиџиев и третопласираните Ѓорги Дончев и Константин Гетов. им/мд/