Животот и делото на Ченто преку фотографии претставени во Охрид
- Животот и делото на првиот претседател на президиумот на АСНОМ, Методија Андонов - Ченто прикажан низ 250 фотографии со кратки информации за 150 настани беше изложен денеска во Спомен-куќата
![Животот и делото на Ченто преку фотографии претставени во Охрид](https://new.mia.mk/index.php/images/20221128064211_big_730x400_90.webp )
Охрид, 18 ноември 2022 (МИА) - Животот и делото на првиот претседател на президиумот на АСНОМ, Методија Андонов - Ченто прикажан низ 250 фотографии со кратки информации за 150 настани беше изложен денеска во Спомен-куќата на Христо Узунов во Охрид.
Изложбата насловена „Ченто - биографија низ фотографија“ на Рубинчо Белчески ја отворија директорите на Охридскиот и Прилепскиот музеј, Катерина Велкоска и Горан Цветкоски.
Посетителите, како што истакна Велкоска, на 250 хронолошки поставени фотографии ќе можат да го видат животот и делото на Ченто, од неговото детство, предвоениот, воениот и периодот по ослободувањето, се до неговата смрт, како и фотографии на дела создадени за него.
- Содржините од изложбата збогатени со кратки информации на 150 настани, кои ги дообјаснуваат „замрзнатите“ моменти од фотографиите, неколку текстови на авторот и делови од говори, мисли и изјави на Ченто, ја прават фотомонографијата, која го заокружи проектот, посочи Велкоска.
Изложбата ја организираат музеите од Прилеп и од Охрид по повод 120 години од раѓањето и 65 години од смртта на Методија Андонов - Ченто, а пред охридската публика ќе биде достапна секој работен ден до 30 ноември годинава. сс/мд/
![изложба за Ченто, Охрид](/articles/images/d0b6d0b8d0b2d0bed182d0bed182-d0b8-d0b4d0b5d0bbd0bed182d0be-d0bdd0b0-d1/KmHp14l4Q/placeholder.webp?use_watermark=0)