Лондон, 25 март 2024 (МИА) - Поранешниот одбранбен фудбалер Ешли Кол ќе биде првиот што ќе биде примен во Куќата на славните во Премиер лигата во 2024 година.

Кол помина 15 сезони со Арсенал и Челзи, освојувајќи три титули во Премиер лигата. Играчот беше дел од тимот на „Топџиите“ кој не загуби ниту еден натпревар во сезоната 2003/04.

Вкупно, фудбалерот одигра 385 натпревари во Премиер лигата. На 147 натпревари со негово учество, екипите на Кол не примија гол. Тој постигна 15 гола и 31 асистенција.

- Чест ми е што сум примен во Куќата на славните во Премиер лигата. Убаво е да се добие награда на крајот од кариерата. Во текот на мојата кариера само се трудев да дадам се од себе и да настапувам на пристојно ниво. Ден по ден, натпревар по натпревар. Како дете, не сонуваш за вакво нешто и го правиш тоа едноставно поради љубовта кон фудбалот. Сум играл за неколку неверојатни клубови со неверојатни навивачи. Освојувањето трофеи со мојот клуб од детството Арсенал и Челзи се неверојатни спомени кои ќе останат со мене засекогаш. Почестен сум што станувам дел од Куќата на славните, во која веќе се вклучени Алан Ширер, Тиери Анри, Дидие Дрогба и Рио Фердинанд, рече Кол.

Покрај Кол во Куќата на славните во Премиер лигата во 2024 година ќе влезат уште двајца фудбалери кои ќе бидат одредени како резултат на гласањето на навивачите.

За да се квалификуваат за Куќата на славните оваа сезона, играчите мора да се пензионираат пред 1 јануари 2024 година. Во критериумите за избор се земаат предвид само достигнувањата во кариерата во Премиер лигата. зс/

Фото: ЕПА